Dagur Rafn nokkur kvartar undan því innan hóps Vesturbæinga að þegar hann leggur bíl sínum ólöglega þá stundi íbúar það að fikta í bílnum. Líkt og gefur að skilja þá er gert stólpagrín af Degi fyrir þetta, enda viðurkennir hann sjálfur að þetta sé bara gert þegar hann leggur ólöglega.

„Það virðist vera orðin einhverskonar hefð að fikta í bílum sem eru illa/ólöglega lagðir hérna í vesturbænum. Eigum við ekki bara að leyfa löggunni að sjá um að sekta í staðin fyrir að taka þetta í okkar eigin hendur? Ef ég verð vitni af þessu hvortsemer það verður á mínum bíl eða öðrum breytist þetta í lögreglumál! (Er ekki að biðja um ráðleggingar hvernig á að leggja),“ skrifar Dagur Rafn.

Nær öll svör við þessu einkennast af háði og spotti á kostnað Dags. „Ef ég skil þig rétt þá gerist þetta ekki ef bíllinn er löglega lagður? Vandamálið leyst,“ skrifar Þorbjörn nokkur meðan annar maður settur upp leikþátt: „„112 góðan dag“ –„ÞAÐ ER EINHVER AÐ LYFTA RÚÐUÞURRKUNUM UPP Á BÍL. KOMIÐ STRAX!“.“

Einn maður segist hafa lent í þessu sama, en hans viðbrögð voru önnur. „Hef einmitt orðið var við þetta og lent í þessu einu sinni. Var einmitt mjög ànægður með þessa borgalegu óhlýðni og hugsaði hlýtt til viðkomandi að vera sniðugur í að minna mig à að leggja ekki eins og fàviti,“ segir sá maður.

Kona ein tekur á sig ábyrgð og viðurkennir að hún stundi það hiklaust að lyfta rúðuþurrkunum. „Ég geri þetta hiklaust við bíla sem lagt er yfir gangstéttir. Bílstjórarnir valda mér veseni með því að þvinga mig til að ganga út á akbraut. Þau mega þá bara alveg lenda í því veseni að laga rúðuþurrkurnar á bílnum sínum,“ skrifar hún og fær fjölda læka.

Líkt og fyrr segir þá var nær enginn sammála Degi Rafni og er eftirfarandi athugasemd lýsandi fyrir afstöðu Vesturbæinga: „Sorrý, en við höfum bara enga samúð með frekjuhundum sem þessum. Enginn vorkunn að þurfa að finna annað stæði og labba nokkra aukametra.“