Bílvelta varð í Brekadal í Reykjanesbæ um helgina, en þar hafði ökumaður misst af beygju sem hann hugðist taka. Ekki vildi betur til en svo að bifreiðin hafnaði utan vegar og valt út í móa þegar ökumaðurinn ætlaði að hemla og snúa við. Ökumaður kenndi eymsla og ætlaði að leita til læknis en bifreiðin var óökufær eftir veltuna.
Í skeyti frá lögreglunni á Suðurnesjum segir einnig að rúta hafi runnið út af Norðurljósavegi í hálku. Dráttarbifreið var fengin til að draga hana upp á veginn. Engir farþegar voru um borð.
Þá kærði lögreglan á Suðurnesjum nokkra ökumenn fyrir of hraðan akstur. Sá sem hraðast ók mældist á 132 kílómetra hraða á Reykjanesbraut þar sem hámarkshraði er 90 kílómetrar á klukkustund. Um var að ræða erlendan ferðamann.
Fáeinir voru svo teknir úr umferð vegna gruns um vímuefnaakstur.
