Femínistinn Elísabet Ýr Atladóttir hefur ritað pistil sem er áhugavert innlegg í umræðuna um mál lektorsins Kristjáns Gunnars Valdimarssonar og fréttaflutning um þau, en Kristján er grunaður um fíknefnaneyslu, að veita ungmennum fíkniefni á heimili sínu og fyrir kynferðisofbeldi gegn ungum konum. Fyrr í dag tók upplýsingafulltrúinn Ragnhildur Sverrisdóttir til varna fyrir Kristján Gunnar sem hún segir vera gamlan vin sinn. Segir hún að framferði hans megi rekja til þess að hann sé sjúkur af fíkn. Ragnhildur skrifaði meðal annars:
„Það er hörmulegt að horfa upp á einstaka fjölmiðla nánast fagna skelfilegum viðburðum í lífi gamals vinar míns. Þessi góði drengur, með glæstan feril sem lögfræðingur og kennari, er núna djúpt sokkinn fíkill. Starfið horfið, heimili hans undirlagt vikum saman af drykkju og dópi hans og neyslufélaga hans og nú hefur hann verið handtekinn, sakaður um skelfilegan glæp gegn ungri konu.“
Elísabet leggst gegn þessu viðhorfi og segir að menn verði ekki ofbeldismenn vegna fíkniefnaneyslu og ekki sé hægt að lækna þá af ofbeldi og kvenhatri með því að senda þá í fíknimeðferð. Telur hún þetta viðhorf vera dæmi um meðvirkni með ofbeldismönnum. Pistill Elísabetar er eftirfarandi:
Menn verða ekki ofbeldismenn vegna fíkniefna. Menn nauðga ekki útaf því þeir voru fullir. Menn velja að beita ofbeldi og nauðga, þeir vita hvað þeir eru að gera og það að þeir noti vímuefni þýðir ekki að þeir alltíeinu-púff verði nauðgarar alveg óvart.
Fólk vill gera mikið úr fíknivanda ofbeldismanna og láta sem það sé einhver djöfull sem býr í þeim. Djöfull sem hægt er að fjarlægja með því að fjarlægja efnin. Særa úr þeim illa ofbeldisanda einhvernveginn. En allir heilvita sérfræðingar eru sammála um að ofbeldismenn sem eiga við fíknivanda að stríða hætta ekki að vera ofbeldismenn þegar þeir fara í meðferð. Þú getur nefnilega ekki læknað kvenhatur og níðingsskap með því að senda menn á Vog. Það er engin tilviljun að svo margar konur sem fara í meðferð við fíknivanda segja sögur af ofbeldismönnum þar og hvernig þeir „veiða“ ný fórnarlömb. Samfélagið hefur vonandi ekki gleymt hvernig karlmaður nauðgaði 16 ára stelpu á Vogi fyrir stuttu.
Fíkn hefur víðtæk áhrif, það er engin spurning. Fólk getur gert allskonar sem kæmi ekki til greina ef þau væru ekki að berjast við fíknivanda. En menn sem beita ofbeldi gera það þótt þeir séu edrú. Menn undir áhrifum fíkniefna og ákveða að nauðga og berja eru grófari og hættulegri en ef þeir væru edrú.
Þótt Kristján Gunnar Valdimarsson er bara nýjasta dæmið af þeim sem fá að njóta vafans hjá mörgum – bara því hann neytti fíkniefna – þá er þetta gegnumgangandi mýta að áfengi og önnur vímuefni orsaki ofbeldi og nauðganir. Fíkniefni gera ofbeldismenn hættulegri – þau breyta engum í ofbeldismann. En fíkniefni hafa verið ofboðslega þægileg og áhrifarík leið fyrir nauðgara og ofbeldismenn til að komast hjá ábyrgð á brotum sínum. Reynum okkar besta og gerum 2020 að árinu sem við leyfum þeim það ekki.
