Markaðurinn, sem fylgir með Fréttablaðinu, hefur valið verstu viðskipti ársins og er niðurstaðan birt í blaðinu sem kemur út í dag.

Í efsta sætinu yfir verstu kaupin eru kaupin á skuldabréfum fasteignafélagsins Upphafs sem vöktu talsverða athygli í sumar. „Fjárfestar voru varla búnir að greiða fyrir bréfin þegar það uppgötvaðist að eigið féð var ekkert og útgefandinn í gríðarlegri lausafjárþröng,“ segir einn álitsgjafi Markaðarins.

Næst á eftir þessum viðskiptum kemur sala Gildis lífeyrissjóðs á eignarhlut sínum í Brimi. Gildi seldi nær allan eignarhlut sinn til FISK-Seafood í ágúst fyrir um fimm milljarða króna en síðan þá hafa bréf Brims hækkað mikið, eða um tæp 18 prósent.

Í þriðja sætinu yfir verstu viðskiptin var starfsemi Samherja í Namibíu. „Óháð því hvað rannsókn á málum Samherja mun leiða í ljós þá hafa viðskiptin valdið félaginu gríðarlegu tjóni nú þegar,“ hefur Markaðurinn eftir einum úr dómnefnd.