Þingmaður Samfylkingarinnar, Guðmundur Andri Thorsson, gagnrýnir nýja bók Einars Kárasonar um ævi Friðriks Þórs Friðrikssonar á Facebook í dag. Vænir hann Einar meðal annars um að hafa stolið titli bókarinnar, Með sigg á sálinni.
„Ég skil ekki alveg titilinn heldur; vissulega hefur Frikki orðið fyrir margvíslegum áföllum um sína daga – og margoft risið á ný – en þegar Ólafur Thors talaði um að hann væri kominn með sigg á sálina vísaði hann til þess að illt umtal sem stjórnmálunum fylgir, slúður og níð hefði ekki áhrif á sig enda væri hann „kominn með sigg á sálina“. Þarna hefur snjöll líking verið tekin traustataki án mikillar umhugsunar,“ skrifaði Guðmundur Andri.
Einar Kárason hefur svarað fyrir þennan meinta stuld frá Ólafi Thors í færslu á Facebook.
Hér á feisbúkk hafa menn í dag fjasað af litlu viti um ævisögu Friðriks Þórs, og meðal annars að titillinn sé stolinn frá Ólafi Thors“
Einar segir titilinn eðlilegan í ljósi þss að Friðrik Þór heldur mikið upp á leikritið Hamlet, en þaðan sé titillinn kominn.
„Reyndar er það svo að Frikki heldur mikið upp á leikritið Hamlet, sem margir kannast við, og sótti líkinguna þangað:
„Fyrsti grafari grefur og syngur.
Hamlet: Er karlinn öldungis kærulaus við verk sitt? hann syngur meðan hann tekur gröf!
Hóras: Vaninn hefur þæft honum sigg á sálina.“
(William Shakespeare: Hamlet. Þýð: Helgi Hálfdanarson)
Það er einkennilegt ef ekki má vitna í Sjeikspír án þess að fá leyfi til þess frá Thórsættinni.“
Guðmundur Andri svarar í athugasemd við færsluna og spyr hvort hann sé þá núna orðinn af Thórsættinni
„Það er alltaf viss áfangi í samræðum. Athugasemdir mínar við bókina snerust að vísu hvorki um þetta né Askenasí, og það veistu jafn vel og ég, Einar Kárason“
Einar spyr þá á móti hver hafi eiginlega dregið Thórsættina inn í umræðuna.
„Bíddu, hver dró Thórsættina inn í þessa umræðu? Sár yfir að einhverju væri stolið frá frænda?“
Fræg eru ummæli Ólafs Thors, fyrrverandi forsætisráðherra, er hann var skammaður á fundi og svaraði að bragði: „Það þýðir ekkert fyrir ykkur að skamma mig. Ég er löngu kominn með sigg á sálina.“ Síðan þá hefur þessi frasi gjarnan verið tileinkaður Ólafi og þykir merkja að vera orðinn reynslunni ríkari. Var Ólafur þekktur fyrir orðheppni sína og hnyttni til að mynda á að hafa verið kallað inn í ræðu hjá honum að hann kynni ekki muninn á þorski og ýsu og svaraði Ólafur þá um hæl: „Ég þekki þó að minnsta kosti muninn á þér og þorski og það er meira en margir gera.“
Friðrik Þór Friðriksson gaf þó út örsögur árið 1985 sem einnig báru nafnið : Með sigg á sálinni, svo þessi frasi hefur honum ekki verið alls kostar ókunnugur og því líklega eðlilegt og skiljanlegt að ævisaga hans beri það nafn, enda fjallar hún um það einmitt að vera orðinn reynslunni ríkari.
