„Lítið jólatré, einmana og yfirgefið eins og ég,“ segir í vinsælu íslenskuðu jólalagi. Í leiðara sínum í nýjasta helgarblaði Fréttablaðsins vekur Davíð Stefánsson, ritstjóri Fréttablaðsins, athygli á því að líkt og í laginu þá séu margir einmana á jólunum.

„Einmanaleiki er ekki það sama og vera einn. Við erum öll ein með sjálfum okkur. Öll finnum við fyrir einmanaleika einhvern tímann en það er ekki fyrr en okkur finnst við vera föst í einmanaleika sem hann verður að vandamáli. Einmanaleiki einkennist af depurð yfir því að vera einn og afskiptur og hefur bæði áhrif á andleg og líkamlega heilsu“

Davíð bendir á að í Bretlandi er farið að tala um einmanaleika sem lýðheilsufaraldur sem auki líkur á hrörnun, innlögn á hjúkrunarheimili og hærri dánartíðni. Rannsóknir hafi sýnt að einmanaleiki geti haft verri áhrif á líkamlega heilsu manna heldur en tóbaksreykingar.

„Það er á hátíðum eins og jólum sem við tengjum við fjölskyldu og vini sem menn finna til einmanaleikans.“

Í Bretlandi sé áhersla lögð á að aldraðir einangrist ekki félagslega og hvatt samfélagið til að styðja betur við eldra fólkið sitt. Hér á íslandi hafi farið fram mælingar á einmanaleikann og töldu þá menn að líkt og í Bretlandi, væru það eldri borgarar sem helst upplifðu einmanaleika. En annað kom þó á daginn.

Það reyndist vera unga fólkið okkar, á aldrinum 18-24 ára sem helst finnur til einmanaleika á Íslandi.

„Þar greina menn mun meiri tilfinningalegan einmanaleika. Strákar upplifi meiri einmanaleika en stelpur og séu minna hamingjusamir að staðaldri. Þeir séu auk þess jafn miklar tilfinningaverur og stelpur en eigi erfitt með að sýna það og einangrist frekar tilfinningalega.“

Samfélagsmiðlar geta þar spilað stórt hlutverk.

„Flest berum við okkur stöðugt saman við aðra, meðvitað og ómeðvitað, og á þetta ekki síst við um ungt fólk. Í gegnum samfélagsmiðla er byggð glansmynd af lífi annarra. Það getur ýtt undir einmanaleika þegar fábrotið líf er borið saman við að því er virðist skemmtilegt og ríkulegt líf annarra“

Að lokum hvetur Davíð Íslendinga til að huga vel að náunganum um jólin.

„Hver maður dafnar við hjartayl og kærleika. Það er mikilvægt að umvefja sig og aðra hlýju og væntumþykju. Um jólin finna margir til einmanaleika. Hugum við að öðrum, fjölskyldu, vinum og nágrönnum.“