Starfsfólk Isavia ákvað að bregða út af vananum þetta árið með því að sleppa að gefa hvert öðru jólagjafir, og láta í stað andvirði gjafanna renna til góðs málefnis.

Fjölskylduhjálp Íslands sér fram á erfið jól í ár en í tilkynningu á vef samtakanna segir að fjármunir séu af skornum skammti, styrkir frá hinu opinbera dugi skammt og ásóknin þessi jól eftir matvælaaðstoð sé mun meiri en búist var við.

„Jólin nálgast óðfluga og sjá margir í þessum hópum ekki fram á að geta haldið jól yfirhöfuð eða með lítilli reisn. Í fyrra aðstoðuðum við um 2.000 manns fyrir jólin og er ekki búist við færri í ár miðað við fyrirspurnir til okkar sem hófust óvenju snemma í ár.

Fjármagn er hins vegar takmarkað, og því miður sjáum við fram á að þurfa að setja þak á hversu marga við getum aðstoðað í ár, nema samfélagið okkar taki höndum saman og leggi verkefninu lið.“

„Þetta var frábært framtak hjá starfsmönnum okkar hjá Isavia,“ segir Guðjón Helgason upplýsingafulltrúi Isavia, í samtali við DV.

„Um 60 starfsmenn á tveimur vöktum sem sinna öryggisleit starfsmanna og öryggisleit í bifreiðum á gátstöðvum við Keflavíkurflugvöll hafa haft þann sið að skiptast á gjöfum í leynijólasveinaleik (secret santa) fyrir jólin. Þetta árið tóku þessir starfsmenn ákvörðun um að láta peninginn, sem annars færi í gjafakaup, renna til góðs málefnis.

Sú upphæð sem safnaðist, rúmlega 200 þúsund krónur, fóru til Fjölskylduhjálpar Íslands í Reykjanesbæ en á meðfylgjandi mynd má sjá nokkra af starfsmönnum Isavia ásamt Ingu Birnu Kristinsdóttur hjá Fjölskylduhjálp Íslands í Reykjanesbæ.

„Hér er um flott framtak að ræða hjá öflugu starfsfólki okkar,“ segir Guðjón jafnframt.