Líkt og DV greindi frá í morgun þá er Tónlistarmaðurinn og matreiðslumeistarinn Ásgeir Magnús Sæmundsson, betur þekktur sem Geiri Sæm látinn. Meðal þeirra sem minnast Geira er fjölmiðlamaðurinn Frosti Logason sem birti færslu um hann á Facebook-síðu sinni.

„Elsku Geiri, greindist með krabbamein fyrir nokkrum mánuðum og tapaði orrustunni á sunnudaginn síðasta. Rétt fyrir jól. Ofboðslega sorglegt.“

„Þessi góði drengur var alveg magnaður músíkant og yndisleg manneskja.“

Frosti segir baráttu Geira við Krabbamein og andlát hans afskaplega sorglegt. Í færslu sinni minnist Frosti þess er hann fékk Geira til að grípa gítarinn á ný.

„Við vorum svo stoltir strákarnir á Xinu árið 2012 þegar við fengum hann til að dusta rykið af gítarnum og stíga aftur á svið eftir margra ára hlé. Við komum honum í samband við hljómsveitina Kiriyama Family og þeir æfðu saman upp nokkurra laga prógram sem þeir svo spiluðu á tónleikum okkar á Menningarnótt það árið. Öll bestu lögin hans Geira.“

„Geiri var þvílíkt glaður með þetta og var auðvitað yfir sig hrifin af meðleikurum sínum sem voru eins og hann, allt stórkostlegir tónlistarmenn. Hann hrósaði þeim þvílíkt og var sjálfur hógværðin uppmáluð.“

Að lokum sendir Frosti fallega kveðju til Geira, fjölskyldu hans og vina.

„Hvíl í friði elsku Geiri minn og góða ferð til hunangstunglsins. Ástarkveðjur til fjölskyldu hans og vina.“