Lögreglukonan Ólafía Kristín Norðfjörð hefur fengið þau skilaboð frá Háskólanum á Akureyri að hún sé vanhæf til að halda áfram námi sínu í lögreglufræðum vegna þess að hún tekur inn kvíðalyfið Sertral. Þetta kemur fram á vef Fréttablaðsins.

Ólafía segir nám sitt hafa gengið vel og hún hafi sinnt því meðfram fullu starfi sem lögreglumaður. Trúnaðarlæknir tjáði henni hins vegar að inntaka kvíðalyfsins gerði hana ófæra um áframhaldandi nám í faginu. Málið var tekið fyrir í valnefnd skólans og komst hún að sömu niðurstöðu.

Þrátt fyrir þetta starfar Ólafía áfram sem lögreglumaður en hún hefur árangurslaust kallað eftir skriflegum rökstuðningi fyrir ákvörðuninni.

Hún segir við Fréttablaðið:

„Ég hef að mínu mati mætt miklum dóna­skap frá þeim sem fara fyrir þessu og fengið ó­fag­mann­leg svör við spurningum mínum. Ég get ekki trúað því að þetta sé virki­lega það sem koma skal innan lög­reglu­fræðinnar.“