Gunnar Jóhann Gunnarsson, sem hefur játað að hafa orðið hálfbróður sínum, Gísla Þór Þórarinssyni, að bana, segist á Facebook-síðu sinni sakna Gísla gífurlega. Hann birtir þar mynd af þeim báðum frá síðustu öld og skrifar:

„Það er ekki hægt að lýsa því með orðum hversu mikið ég sakna þín, ég elska þig alltaf elsku bróðir minn.“

Gunnar Jóhann lokaði Facebook-aðgangi sínum eftir morðið en virðist hafa opnað aftur á aðganginn í haust. Gunnar Jóhann hefur neitað því að um ásetningsbrot hafi verið að ræða og segir atburðinn hafa verið slys.

Samkvæmt nýjustu fregnum af gangi mála í Noregi þá var réttarhöldum frestað en það stóð til að aðalmeðferð myndi hefjast þann 2. desember næstkomandi. Nú er talið líklegast að réttað verði í málinu í febrúar.

Gunnar Jóhann  neitar því að hafa komið að heimili Gísla Þórs með þann ásetning í huga að verða honum að bana. Hann á að baki langan sakaferil á Íslandi og hefur meðal annars verið dæmdur fyrir nauðgun og ofbeldisbrot.