Brotist hefur verið inn í nokkrar byggingar Háskóla Íslands undanfarið og tölvubúnaði og fleiru verðmætu stolið af skrifstofum kennara og doktorsnema. Einnig hafa skemmdarverk verið unnin á húsnæði skólans. RÚV greinir frá þessu.

Fram kemur í fréttinni að háskólinn sé í nánu samstarfi við lögregluna vegna málsins og tekin hafi verið ákvörðun um að hafa sólarhringsvakt á öllu háskólasvæðinu yfir hátíðirnar.

Kemur einnig fram að brotist hafi verið inn í þrjár byggingar á háskólasvæðinu að undanförnu og einnig hafi verið brotist inn í Norræna húsið og stolið verðmætum þaðan. Vegna mikils umgangs háskólanema á prófatíma sé auðvelt að smeygja sér inn um dyr á háskólasvæðinu þó að sérstök háskólakort þurfi að komast inn í læstar byggingarnar. Þá hafi þjófur brotið glugga og hurðir til að komast inn á skrifstofur.