Persónuvernd hefur komist að þeirri niðurstöðu að Vinnumálastofnun sé óheimilt að fylgjast með IP-tölum bótaþega.

Bótaþegi atvinnuleysisbóta kvartaði til Persónuverndar í kjölfar þess að fá bréf frá Vinnumálastofnun þar sem stofnunin kvaðst hafa fengið upplýsingar um að bótaþeginn hafi verið erlendis á bótatíma, án þess að upplýsa stofnunina um ferðalagið.

Vinnumálastofnun byggði á því að þegar bótaþegi hafi skráð sig inn á „mínar síður“ á vef Vinnumálastofnunar í byrjun júní 2018 hafi IP-tala verið skráð í Bretlandi.

Í ljós kom að bótaþegi notaðist við svonefnda VPN-þjónustu til að horfa á streymisveituna Netflix. Var því IP-tala hennar skráð erlendis, þó svo bótaþegi hafi allan tímann verið staddur á Íslandi.

Persónuvernd tók fram að IP-tölur teljist til persónuupplýsinga og verði vinnsla þeirra að uppfylla skilyrði persónuverndarlaga.

Í niðurstöðu Persónuverndar segir:

„Virkni VPN-tenginga og aðgengileiki þeirra dregur verulega úr áreiðanleika upplýsinga um IP-tölur einstaklinga að því leyti sem slíkar upplýsingar eru nýttar til að staðreyna staðsetningu hlutaðeigandi einstaklings. Líkt og að framan greinir hefur notkun VPN-tenginga aukist verulega að undanförnu og er þekking á þeim orðin mun meiri og útbreiddari en áður.“

Þó svo Persónuvernd hafi áður komist að þeirri niðurstöðu að Vinnumálastofnun væri heimilt að skoða IP-tölur þá sé raunin í dag sú að slíkar upplýsingar séu ekki áreiðanlegar.  Þar sem starfsmaður Vinnumálastofnunar hafi ráðlagt bótaþega í máli þessu að skýra frá Netflix og VPN-notkun sinni þá gat Vinnumálastofnun ekki verið ókunnugt um óáreiðanleika IP-talna.

Vinnsla Vinnumálastofnunar á upplýsingum um IP-tölum samræmdist því ekki lögum og beindi Persónuvernd þeim fyrirmælum til stofnunarinnar að láta af notkjun upplýsinga um IP-tölur umsækjenda um atvinnuleysisbætur.