Það verður brjálað veður í dag um nær allt land og eru appelsínugular viðvaranir í gildi víðast hvar en rauð viðvörun fyrir Strandir og Norðurland vestra.

Rauða viðvörunin er í gildi frá klukkan 17 til 01 eftir miðnætti en spáð er norðan ofsaveðri eða fárviðri (25 til 33 m/s) með mikilli snjókomu og skafrenningi.

„Búast má við víðtækum samgöngutruflunum og tjóni og/eða slysum ef aðgát er ekki höfð. Ekkert ferðaveður er á meðan viðvörunin er í gildi. Búast má við hækkandi sjávarstöðu vegna áhlaðanda, allt að 10 m. ölduhæð og líkur á að smábátar geta laskast eða losnað frá bryggju. Fólki er bent á að fylgjast vel með veðurspám og viðvörunum,“ segir á vef Veðurstofunnar.

Á vefnum Windy.com er hægt að fylgjast með veðrinu um allan heim og hér að neðan er sjónum beint að Íslandi.