Lögreglan á höfuðborgarborgarsvæðinu varar íbúa á höfuðborgarsvæðinu við óveðrinu á morgun. Hún hvetur fólk sérstaklega til að huga að lausamunum en tilkynningin er eftirfarandi:

Afar slæm veðurspá er fyrir morgundaginn og því er vissara fyrir fólk að huga að lausamunum, t.d. garðhúsgögnum, trampólínum, grillum o.s.frv og tryggja að þeir fjúki ekki með tilheyrandi hættu. Sömuleiðis er ástæða til að vekja athygli þeirra sem starfa á byggingarsvæðum á höfuðborgarsvæðinu að huga að stillönsum og slíku, en spáð er norðan eða norðvestan 20-28 m/s síðdegis á morgun, hvassast norðan- og vestantil frá Seltjarnarnesi og upp í Mosfellsbæ. Fólk er hvatt til að fylgjast vel með veðurspám í kvöld og fyrramálið, en útlitið er allt annað en gott fyrir morgundaginn.