Hjónin Jacek Niescier og Elzbieta Niescier búa í Fellahverfinu í Reykjavík og eiga saman börn. Þau eru ákærð fyrir peningaþvætti sem nemur allt að rúmlega 60 milljónum króna. Hjónin eru bæði á fimmtugsaldri, maðurinn er fæddur árið 1973 og konan árið 1974.

Málið verður tekið fyrir í Héraðsdómi Reykjavíkur á morgun en DV hefur undir höndum ákæru héraðssaksóknara í málinu.

Í ákæru segir að hjónunum sé gefið að sök að hafa í fjögur ár, á tímabilinu frá ársbyrjun 2013 til ársloka 2017 ,„tekið við, nýtt, umbreytt eða aflað sér ávinnings af refsiverðum brotum allt að fjárhæð 60.251.867 krónur,“ eins og segir í ákæru.

Rannsókn lögreglu á fjármunum hjónanna sýndu fram á rekjanlegar tekjur þeirra á tímabilinu upp á tæplega 38 milljónir króna en rekjanleg útgjöld, innistæður og haldlagt reiðufé nema hátt í 100 milljónum króna.

Neikvæður lífeyrir hjónanna er reiknaður yfir 60 milljónir króna og hefur þeim ekki tekist að gera grein fyrir því hvernig þau hafa getað aflað þess fjár sem út af stendur í þessum útreikningum. Jacek segist hafa grætt peningana í spilakössum en greining sem héraðssaksóknari lét gera á virkni spilakassanna og spilamennsku Jacek leiddi í ljós að það væri útilokað.

Málið kom upp þegar Jacek var handtekinn vegna hlutdeildar sinnar í stóru fíkniefnasmygli árið 2017. Við húsleit fundust umtalsverðir fjármunir í peningaseðlum, bæði íslenskum krónum og evrum – svo nemur milljónum. Þessir fjármunir hafa verið lagðir inn á sérstakan bankareikning sem héraðssaksóknari stofnaði til vörslu hinna haldlögðu fjármuna.

Jacek er talinn hafa staðið að innflutningi á a.m.k. 2 kg af amfetamíni til Íslands. Auk þess máls hefur hann fjórum sinnum gerst sekur um umferðarlagabrot. Elzbieta er hins vegar með hreint sakavottorð.

Krafist er auk upptöku fjármunanna sem fundust í íbúðinni að bíll hjónanna af gerðinni Hyundai Tucson verði gerður upptækur sem og eignarhlutur þeirra í íbúð þeirra í Fellahverfi. Krafist er að hjónin sæti refsingu fyrir peningaþvætti og verði dæmd til greiðslu málskostnaðar.