Þrjú mál komu inn á borð lögreglunnar á Suðurlandi vegna utanvegaaksturs. Að sögn lögreglu lauk tveimur þeirra með sektargerð en þar var annars vegar um að ræða ökumann sem ók utan vega við Breiðbalakvísl á föstudag og var stöðvaður af vegfaranda þar. Hins vegar var um að ræða erlendan ferðamann á Breiðamerkursandi við Þröng á miðvikudag í síðustu viku.

Þriðja málið er til rannsóknar hjá lögreglu en þar stóðu landverðir Vatnajökulsþjóðgarðs erlendan ferðamann að akstri undan vegar við Jökulsárlón.

63 ökumenn voru kærðir fyrir að aka of hratt í umdæmi lögreglunnar á Suðurlandi í liðinni viku.   Tveir þeirra voru á meiri en 140 kílómetra  hraða á vegi þar sem er 90 kílómetra hámarkshraði.  Einn var mældur á 119 km/klst hraða skammt frá Vík þann 30. nóvember síðastliðinn þar sem leyfður hámarkshraði er 90 km/klst. Fljúgandi hálka var á veginum og varla stætt.   Ökumaðurinn kannaðist við brot sitt og greiddi sekt sína á vettvangi. Hann kvaðst aldrei hafa keyrt í hálku áður.

Fjórir ökumenn eru grunaðir um að hafa ekið bifreiðum sínum undir áhrifum áfengis í liðinni viku.   Allir fóru þeir frjálsir ferða sinna að skýrslutöku lokinni.

11 umferðaróhöpp voru tilkynnt í liðinni viku. Í þremur þeirra urðu slys á fólki og var fólk flutt til aðhlynningar á viðeigandi sjúkrastofnun.