Lögreglan á höfuðborgarsvæðinu vill minna á slæma spá Veðurstofunnar, en spáð er roki seinni part dags, í kvöld og fram til morguns á höfuðborgarsvæðinu. Gul viðvörun er í gildi og hefur lögregla hvatt fólk til að ganga frá lausum munum til að forðast tjón.
Spáð er suðaustan stormi, 15 til 25 metrum á sekúndu, en hvassast verður á Kjalarnesi. Einnig má búast við mjög snörpum vindhviðum á Kjalarnesi, 25 til 30 metrum á sekúndu. Skýjað verður og úrkomulítið, en dálítil rigning af og til í nótt. Suðaustan 5-8 eftir hádegi á morgun. Hiti verður 2 til 5 stig.
„Fólk er hvatt til að sýna aðgát og ganga frá lausum munum til að forðast tjón. Einnig vill lögreglan beina þeim tilmælum til verktaka að ganga vel frá byggingar – og framkvæmdasvæðum sínum og girðingum í kringum þau,“ segir lögreglan í færslu á Facebook-síðu sinni.
