Maður á fertugsaldri, Íslendingur búsettur í Noregi, var þann 20. nóvember sakfelldur í Héraðsdómi Reykjavíkur fyrir fjölda afbrota auk þess sem gert var upptækt dýnamít sem hann var með í fórum sínum, auk fíkniefna.

Maðurinn fór inn í Gróðrastöðina Mörk í apríl árið 2017 og stal þaðan Snyder loftpressu að verðmæti 250.000 krónur. Hann stal líka verkfærakassa og leiðbeiningarbæklingi fyrir sáðvél.

Í annan stað var hann sakaður um að hafa tekið bíl traustataki og ekið honum víðsvegar uns hann missti stjórn á bílnum við Bláfjallaveg og keyrði út af.

Auk þess var hann sakfelldur fyrir að hafa ekið undir áhrifum ávanabindandi lyfja.

Ennfremur voru fíkniefni og dýnamít gerð upptæk hjá manninum.

Hann var dæmdur í 45 daga skilorðbundið fangelsi og til að borga 350.000 króna sekt í ríkissjóð. Þá var hann sviptur ökuréttindum og dæmdur til að greiða rúma milljón í málsvarnarlaun og annan sakarkostnað.