Philippe opnaði skemmtistaðinn Sirkus á Seyðisfirði í sumar í samstarfi með Sigríði Guðlaugsdóttur, sem er einnig þekkt sem Sigga Boston. Eiga þau saman fyrirtækið en eignarhluta þeirra er skipt í helminga. Í myndbandinu segist Philippe hafa rekið aðilann sem sér um fjármál fyrirtækisins og í kjölfarið kveðst hann hafa fengið hótanir frá viðkomandi. Þá segir hann ættingja hans hafa meðal annars brotist inn í hús sitt. Stundin greindi fyrst frá þessu og þýddi það sem Philippe segir í myndbandinu.
„Í fyrsta skipti á ævinni óttast ég um líf mitt og ástvina minna,“ segir Philippe í myndbandinu. „Ég hef mætt áreiti á nánast hverjum degi og í gær var mér hótað, sagt að óttast um líf mitt á íslensku. Mér var sagt: „Ég skal drepa þig. Ég ætla að drepa þig.“ Þetta eru óhugnanlegir hlutir og ég sætti mig ekki við þá. Áður en þetta gerðist reyndi sama manneskja að keyra mig niður á bílnum sínum. Viðkomandi sendi ættingja til að ógna mér og reyna að berja mig.“
„Ég hef verið móðgaður og það er ófrægingarherferð í gangi gegn mér með viðbjóðslegum lygum um einkalíf mitt, heilsu, kynhneigð og lífstíl,“ segir Philippe. „Afleiðingar þess eru að allt þorpið, samfélagið hérna, sem ég hef gefið tíma minn, ást og vinnu undanfarin ár, hefur snúist gegn mér. Nema nokkrir sem styðja mig því þeir hafa séð ofbeldið.“
Hann segist ekki fá neina hjálp frá yfirvöldum á svæðinu, hvorki lögreglan né bæjaryfirvöld vilji hjálpa honum. „Þetta er ákall á hjálp. Ég hef allan lagalegan rétt til að gera það sem þarf með fyrirtækið mitt,“ segir Philippe. „En ég er örvæntingafullur að kalla eftir stuðningi af því að ég er útlendingur í landinu og fallegt, virt fólk í þessu fallega samfélagi hefur sagt mér að það muni gera hvað sem er til að tortíma fyrirtækinu mínu. Að ég sé ekki velkominn lengur í samfélaginu, ég sé einangraður og þau muni gera allt í þeirra valdi til að losna við mig og ég eigi engin réttindi. Jafnvel þó þau hafi samþykkt mig sem samkynhneigðan þá hafi ég ekkert að gera hér lengur og ég eigi ekki að ráða lögfræðing til að verja mig því við séum ein stór fjölskylda. Þetta er mafíustarfsemi.“
