Íbúi í Reykjanesbæ sagði frá óhugnanlegri reynslu tíu ára dóttur sinnar og vinkonu hennar, er þær gengu heim úr skólanum. Þetta kemur fram í Facebook-hóp sem ætlaður er íbúum bæjarins , en færsla hans hefur vakið talsverða athygli.

„Upp að þeim kemur enskumælandi maður, líklega frá mið-austurlöndunum (samkvæmt þeirra lýsingu) á grænum jeppa eða jeppling og hefur við þær kynferðislegar handbendingar og tal.“

Maðurinn segir að dóttir hans og vinkonan hafi gert það rétta í stöðunni og hlaupið í burtu.

„En bíllinn eltir þær þó nokkurn spöl og þær þurftu að fela sig við kirkjuna áður en hann hvarf á brott.“

Maðurinn segist hafa gert lögreglu viðvart um málið og tekur hann einnig fram í athugasemd að hann treysti lögreglunni fyrir verkinu.

„Við erum lítið og gott samfélag og með samstöðu eigum við að geta upprætt svona viðbjóð með því að standa saman og vera vakandi! Ef við sjáum barn hlaupa öskrandi frá bíl, stoppum, athugum hvað er í gangi, ekki bara keyra framhjá eins og ekkert komi manni við. Það keyrðu bílar framhjá þeim á meðan þær öskruðu og hlupu frá.“