Heiftarleg árás konu á aðra konu í hesthúsi voru viðfangsefni í dómi Héraðsdóms Reykjavíkur í fyrradag. Önnur konan stefndi hinni til greiðslu miskabóta vegna líkamsárásar árið 2015. Átökin voru blóðug og vægast sagt skrautleg, þar sem notast var við vopn á borð við hófklippur og skeifu. Blóðgaðist sú kona sem stefnir hinni á höfði er hin stefnda barði hana með skeifu í höfuðið. Um málsatvik og áverka í slagsmálunum segir svo í dómi Héraðsdóms:

„Það er óumdeilt að stefnandi og stefnda lentu í átökum hinn 10. júní 2015 þar sem þær voru staddar saman í hesthúsi að [—]. Þá er það óumdeilt að stefnandi slasaðist í átökunum og hlaut m.a. 3 cm skurð í hársverði, mar á hægri kinn og kringum nefrót, ásamt mari á hálsi og á handlegg. Aðilum málsins ber hins vegar ekki saman um hvernig áverkarnir eru tilkomnir. Stefnandi kveður stefndu hafi slegið sig með hófklippum, slegið sig í andlit með krepptum hnefa og síðan slegið sig með skeifu, en stefnda kveður stefnanda hafa hlotið áverkana sem hún varð fyrir þegar hún féll í gólfið og á steypta brún.“

Árásarþolinn kærði málið til lögreglu en málið var síðan fellt niður þar sem rannsókn dróst, málið var sent aftur til lögreglu frá héraðssaksóknara, og það var að lokum fyrnt. Árasaþolinn stefnir hins vegar hinni meintu árásarkonu með einkamáli til greiðslu skaðabóta.

Þá segir ennfremur um atvikið í dómnum:

„Í frumskýrslu lögreglu, dags. 10. júní 2015, kemur fram að stefnandi hafi setið fyrir utan hesthúsið að [—]þegar lögregla kom á staðinn. Stefnda hafi verið búin að setja dót hennar fyrir utan hesthúsið, þar með talið hjálm sem stefnandi kvaðst ekki eiga. Hún hafi ætlað að skila hjálminum og að hún hafi verið komin inn á gang hesthússins þegar stefnda hafi komið og rifið í hana. Stefnda hafi því næst lamið hana með skeifu svo að gat kom á höfuðið og slegið hana í andlit. Þá hafi vitnið C komið á vettvang og dregið stefndu af stefnanda.“