„Þessi staður er óraunverulegur,“ sagði hin 27 ára gamla Jie Zhao þegar hún stóð fyrir framan Skógafoss sem skartaði sínu fegursta sumarið 2018. Tveimur mánuðum síðar var Jie látin eftir hræðilegt slys í Cambridge, skammt frá Boston, í Bandaríkjunum

Daniel Desroche, 54 ára karlmaður, er nú fyrir dómi vegna gruns um manndráp af gáleysi. Hann ók flutningabifreið sinni á Jie, ekki einu sinni heldur tvisvar, síðdegis þann 5. október 2018. Slysið varð með þeim hætti að Daniel var að bakka bifreið sinni við gatnamót Putnam Avenue og Magazine Street þegar hann bakkaði á Jie.

Á meðan að Jie lá óvíg eftir á götunni ók hann aftur yfir hana þegar hann tók af stað. Vegfarendur reyndu að flauta og láta Daniel vita hvað hafði gerst en hann áttaði sig ekki á því að hann hafði ekið á gangandi vegfaranda. Cambridge Day fjallar um málið á vef sínum og birtir myndir sem Jie birti á Instagram-síðu sinni af Íslandsferðinni.

Á þeim má sjá Jie í góðra vina hópi í Bláa lóninu, Þingvöllum og Reynisfjöru, svo dæmi séu tekin. Nokkrum vikum síðar var hún látin.

Jie flutti til Waukesha í Wisconsin þegar hún var 14 ára og bjó hjá móður sinni. Hún flutti svo til Cambridge þar sem hún var við nám í hinum virta skóla Massachusetts Institute of Technology. Bílstjórinn í málinu á yfir höfði sér fangelsisdóm, allt frá tveimur vikum til tveggja ára.