Um er að ræða hina meintu rafmynt OneCoin sem kynnt var til sögunnar árið 2014 sem arftaki Bitcoin, vinsælustu rafmyntar í heimi. Fyrirtækið átti höfuðstöðvar í Búlgaríu og voru fjárfestar laðaðir að verkefninu með loforðum um gríðarlegan hagnað þegar rafmyntin færi á almennan markað. Samkvæmt bandarískum dómskjölum var svikamyllan sett upp sem nokkurs konar píramídasvindl. Fjárfestar sem keyptu sig inn í „verkefnið“ gátu þannig fengið meira fyrir peninginn, fleiri rafmyntir, ef þeir gátu selt öðrum hugmyndina. Bandaríska alríkislögreglan segir þó að aldrei hafi nein raunveruleg rafmynt legið að baki OneCoin. Fyrirtækið hafi verið rekið á lygum og blekkingum frá upphafi. Uppblásin loftbóla sem á endanum sprakk.
Samkvæmt bandarísku alríkislögreglunni, FBI, náði besta vinkona Ásdísar Ránar, búlgarska athafnakonan Ruja Ignatova, að svíkja út tæpa þúsund milljarða íslenskra króna á heimsvísu áður en hún hvarf sporlaust í október árið 2017. Ekkert hefur spurst til hennar síðan þá og hafa lögregluyfirvöld víðs vegar í heiminum reynt að hafa uppi á henni, líkt og vinkona hennar Ásdís Rán en hún er andlit fyrirtækisins sem talið er að standi að baki svikamyllunni.
Í frétt RÚV kom fram að nokkrir tugir Íslendinga hafi keypt OneCoin og að ekki sé hægt að selja myntina í skiptum fyrir venjulega peninga. Eftir að RÚV birti frétt sína um málið barst þeim ábending um að OneCoin væri með útibú hér á landi í Kópavoginum. Fréttastofa RÚV fór í útibúið til að kanna málið.
Á skiltinu við innganginn var ekki hægt að sjá að þarna væru skrifstofur OneCoin til húsa. Þegar komið var upp á aðra hæð í húsinu sáust þó skilti merkt OneCoin fyrir utan og inni á skrifstofu. Þar var Gunnar Jónasson en hann sagðist ekki tengjast OneCoin heldur sé hann umboðsmaður fyriir Dealshare hér á landi. Dealshare sé markaðstorg á netinu þar sem hægt er að greiða meðal annars með OneCoin.
„Ég fékk umboðið fyrir Dealshaker í júlí og við erum búin að vera starfandi síðan þá. Dealshaker er sölutorg þar sem menn geta keypt og selt svipað og eBay, Amazon og alibaba nema það að hérna getum við verið með þjóðargjaldmiðil og borgað með OneCoin,“ sagði Gunnar í samtali við RÚV. Hann segist ekki vita það nákvæmlega hversu margir Íslendingar eigi OneCoin. „Ég hef svo sem ekki tölu yfir það en þeir skipta einhverjum tugum,“ sagði hann.
„Þið eruð þá væntanlega að selja OneCoin hérna?“ spurði fréttamaður RÚV en Gunnar svaraði því. „Nei, það er ekki hægt að kaupa OneCoin,“ sagði Gunnar. Hann sagði að í staðinn geti fólk keypt aðgang að fjármálafyrirlestri á netinu og fengið þannig réttindi til að ná sér í OneCoin.
