Héraðsdómur Reykjavíkur hefur dæmt tæplega fertugan karlmann í 60 daga fangelsi fyrir nokkur brot. Hann var meðal annars ákærður fyrir gripdeild með því að hafa sumarið 2018 tekið peninga úr sjóðsvél Vinnufatabúðarinnar við Laugaveg. Um óverulega upphæð var að ræða, rúmar þrjú þúsund krónur.

Þá var hann ákærður fyrir að stela fartölu að óþekktu verðmæti úr skoðunarherbergi 3 á gönugudeild Landspítalans að Háaleitisbraut í september í fyrra. Hann var einnig ákærður fyrir þjófnað í tvö skipti úr verslun Hagkaups, annars vegar á matvöru fyrir rúmar tíu þúsund krónur og hins vegar á rakspíra að verðmæti 14 þúsund krónur.

Maðurinn játaði sök fyrir dómi en hann á sakaferil að baki. Árið 2013 var hann dæmdur í tólf mánaða fangelsi fyrir auðgunarbrot. Dómari leit til þess við ákvörðun refsingar að um minniháttar verðmæti var að ræða, hann játaði brot sín skýlaust og hefur þar að auki farið í meðferð við vímuefnavanda og sækir nú eftirmeðferðir í því skyni að breyta lífsháttum sínum.

Hæfileg refsing þótti því 60 dagar í fangelsi en með hliðsjón af sakaferli mannsins þótti ekki fært að skilorðsbinda refsinguna. Auk þess var manninum gert að greiða málsvarnarlaun verjanda síns, tæpar 190 þúsund krónur.