Lögreglan á Suðurnesjum stöðvaði umfangsmikla kannabisræktun í umdæminu á föstudag. Í skeyti frá lögreglu segir að um hafi verið að ræða kannabisgræðlinga í tjaldi og stórar plöntur sem fundust í þremur herbergjum.

„Samtals var um að ræða vel á þriðja hundrað kannabisplöntur auk poka með kannabisefnum í sem lögreglan fann við húsleitina. Að auki voru tugir þúsunda króna sem fundust haldlagðar ásamt plöntum og ræktunarbúnaði,“ segir í skeyti frá lögreglu. Þá segir að húsráðandi hafi verið handtekinn og játaði hann að eiga ræktunina og að hafa staðið einn að henni.

„Lögreglan minnir á fíkniefnasímann 800-5005. Í hann má hringja  til að koma á framfæri nafnlausum upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann. Einnig er hægt að koma ábendingum á framfæri á Facebook – síðu lögreglunnar á Suðurnesjum.“