Frétt Vísis um skrif Sólveigar Bergsdóttur, afrekskonu í fimleikum, hafa vakið mikla athygli í dag. Sólveig, sem er í landsliðinu í fimleikum, gangrýnir að hún eigi erfiðara með að fá vörustyrki en svokallaði áhrifavaldar. „Ég, landsliðskona í fimleikum og afreksíþróttakona, á erfiðara með að fá vörustyrki og/eða samstarf við heilsutengd fyrirtæki en áhrifavaldur í meðallagi á Íslandi. Skekkja? Fleira íþróttafólk sem tengir?“ skrifaði Sólveig á Twitter.

Nú síðdegis vekur Sólveig athygli á því að rapparinn Kristmundur Axel Kristmundsson sé alfarið sammála henni, en hún skrifar „Þjóðin sameinast“. Auk þess að rappa er Kristmundur helst þekktur fyrir að hafa verið dæmdur nokkrum sinnum í fangelsi, nú síðast fyrr á þessu ári vegna líkamsárásar og tilraunar til ráns.

Hvað sem því líður þá er Kristmundur alveg sammála Sólveigu. „Pælið í því maður! Þessar litlu asnalegu stelpur sem allir eru að followa og fylgjast með útaf eitthverju sem ég skil ekki eru að fá fleiri vörustyrki og aðstoð við sinn „frama“ heldur en afreksíþróttafólk. Það er ruglað. Hverjum datt í hug að kalla þetta lið áhrifavalda,“ skrifar Kristmundur og heldur áfram: „Eitthverjar litlar pjöllur á nærbuxunum út í náttúrunni að hala inn cash. Samt hæfileikalausar, ljótar og heimskar.“

Svo virðist sem sífellt fleiri lýsi yfir vanþóknun sinni á þeim sem eru vinsælir á Instagram. Nýlega skrifuðu tveir íslenskir dansarar pistla þar sem þeir sögðu sig fullsadda af hinum svokölluðu áhrifavöldum. Óhætt er að segja margir hafi fyllst Þórðargleði þegar Ríkisskattstjóri tilkynnti að hann myndi rannsaka sérstaklega skattaframtöl áhrifavalda fyrir árið 2018. Í það minnsta mátti sjá það víða á öðrum samfélagsmiðlum.

Þjóðin sameinast pic.twitter.com/yGjkvmiGnf

— Solveig Bergsdottir (@sollabergs) November 5, 2019