Óli Ólafs Ólafsson‎, sem hefur víða látið að sér kveða hvað varðar gagnrýni á þriðja orkupakkann, er afar ósáttur með að fréttamaðurinn ástsæli Bogi Ágústsson hafi hent honum út úr hópnum Norræn stjórnmál. Óli birtir skilaboð sem Bogi ku hafa sent honum en svo virðist sem rót þessara deilna snúist um dónaskap Óla gagnvart Boga. Enn er ekki fyllilega ljóst hvað Óli skrifaði í hópnum, en ljóst er að Bogi tók illa í það.

Ljóst er að Bogi er harður í horn að taka og líður ekki ókurteisi í hópnum sínum, en Bogi er eini stjórnandi hópsins. Téður Óli birtir skilaboðin í öðrum hópi, Málfrelsinu. Í þeim segir Bogi: „Í umræðum er ætlast til kurteisi og að almennir mannasiðir séu viðhafðir. Verði misbrestur á þessu verða færslur og ummæli fjarlægðar. Umræða á síðunni hefur verið hingað til að mati umsjónarmanns til fyrirmyndar og eftirbreytni fyrir aðra hópa á Facebook. Þau eru teljandi á fingrum annarrar handar tilfellin þar sem umsjónarmaður hefur þurft að hafa samband við meðlimi og biðja um að færslur eða ummæli séu fjarlægð,“ skrifar Bogi og vitnar í reglur hópsins

Hann heldur svo áfram og segir: „Athugasemd þín er brot á þessum reglum, annað hvort fjarlægir þú hana sjálfur eða þú verður að finna þér annan vettvang fyrir skrif þín. Ef ég fæ ekki svar og þú fjarlægir ummæli þín á næstu mínútum neyðist ég til að fjarlægja þig úr hópnum.“

Svo virðist sem ummæli Óla hafi tengst starfi Boga á RÚV en hann svarar: „Gerðu hvað sem þú vilt Bogi. Hélt þó að aðgangur þinn af RÚV dugar ekki til að koma lygaþvælu þinni áfram svo þá geturðu stofnað svona grúbbu þar sem þú getur verið frjáls með þvæluna án gagnrýni,“ skrifar Óli í skilaboðum sínum til Boga.

Þá setur Bogi fótinn niður og skrifar: „Þetta er ekki gagnrýni, þetta er atvinnurógur, það er ekki liðið. Ég líð ekki að vera sakaður um slíkt. Þú verður að finna þér annan vettvang.“ Þessu svarar Óli: „Ég held raunar að þú kunnir öllu illa sem ekki fellur að rétttrúnaði og glópalisma. Þetta skín bara af þér á skjánum raunar.“ Bogi svarar og segir samtalinu lokið. Þá sendi Óli til baka fána Íslands og Ísraels.