„Aðeins 7.8% þeirra kynferðisbrota sem komu inn á borð Stígamóta árið 2018 voru kærð til lögreglu. Okkar veruleiki á Stígamótum sýnir að aðeins lítill hluti kynferðisbrota er kærður til lögreglu.“

Þetta segir í færslu sem Stígamót birtu á Facebook-síðu sinni nú í hádeginu. Þó að lítill hluti er kærður til lögreglu segja Stígamót að það þýði ekki að kynferðisofbeldið hafi ekki átt sér stað eða hafi engin áhrif á þá sem því eru beittir.

„Af öllum þeim sem leituðu í fyrsta skipti til Stígamóta vegna kynferðisofbeldis árið 2018 glímdu um 80% við skömm, kvíða og lélega sjálfsmynd í kjölfar ofbeldisins. Um 70% glímdu við endurupplifanir af kynferðisofbeldinu, ótta, erfileika með svefn eða tilfinningalegan doða í kjölfar kynferðisofbeldisins.“

Stígamót segja að þetta séu allt afleiðingar sem þekktar eru hjá fólki sem orðið hefur fyrir áföllum eins og hamförum, stórslysum og kynferðisofbeldi. Og þessar afleiðingar koma einmitt í kjölfar slíkra áfalla.

„Það er því rétt að ítreka að þó að kynferðisofbeldi sé ekki kært til lögreglu þá hefur ofbeldið samt sem áður áhrif á þann sem því er beittur.

Alla daga kemur fjöldi fólks á Stígamót til að vinna úr þessum ósanngjörnu afleiðingum kynferðisofbeldis en aðeins lítill hluti þeirra hafa kært ofbeldið til lögreglu og sumir jafnvel aldrei rætt ofbeldið við neinn.

Það er því mikilvægt að við tökum mark á frásögnum um kynferðisofbeldi og styðjum þá sem beittir eru kynferðisofbeldi í að vinna sig frá þessum ósanngjörnu afleiðingum óháð því hvort dómur hljótist vegna kynferðisofbeldisins eða það kært.“