Leikarinn ástsæli Laddi greinir frá því í viðtali við Fréttablaðið að hann hafi eitt sinn verið við dauðans dyr. Viðtalið fjallar um nýja gamanþætti með Ladda í aðalhlutverki, en söguhetjan stendur andspænis dauðanum.

Laddi segist hafa lent í atviki þar sem hann horfði framan í dauðann. „Ég hef verið ansi nálægt því að deyja. Það var fyrir löngu að ég var á ferðalagi á Austfjörðum. Með hinni víðfrægu hljómsveit sem kallaðist Faxar. Við vorum á heimleið til Reykjavíkur og það var gítarleikarinn í sveitinni sem sat undir stýri. Hann hægði aldrei á sér í beygjum og ég var alltaf að rífast í honum. Hægðu á þér maður!,“ lýsir Laddi.

Hann hlustaði ekki á hann og endaði það næstum illa. „Það kom að því að hann náði ekki einni beygjunni og skrikaði áfram að gljúfri. Þar brotnaði undan bílnum og hann nam staðar á brúninni. Ég horfði ofan í gljúfrið. Þá opnaði ég hanskahólfið og náði í séníver sem ég ætlaði að geyma til verslunarmannahelgarinnar. Ég held ég hafi klárað flöskuna!,“ segir Laddi og bætir við að þeir séu ekki vinir í dag, hann og bílstjórinn.