Eins og greint var frá í morgun hefur Helgi Magnússon, ásamt fleiri aðilum, keypt helmings eignarhlut 365 miðla í Torgi, sem er útgáfufélag Fréttablaðsins. Stefnt er að samruna Hringbrautar og Fréttablaðsins að gefnu samþykki samkeppnisyfirvalda.

Ólöf Skaftadóttir hætti sem ritstjóri Fréttablaðsins í dag en hún hefur starfað á blaðinu í tæp 7 ár. Jón Þórisson lögfræðingur hefur verið ráðinn ritstjóri Fréttablaðsins við hlið Davíðs Stefánssonar og tekur hann því stað Ólafar. Ólöf tjáir sig um starfslokin í færslu á Facebook-síðu sinni.

„Þá er tæplega sjö ára tímabili mínu á Fréttablaðinu lokið. Óneitanlega skrýtin tilfinning. Ég er afskaplega þakklát Ingibjörgu sem gaf mér tækifæri til að ritstýra mest lesna dagblaði landsins þótt ung væri, þakklát fyrir dásamlegan tíma á blaðinu og ekki síst fyrir þá góðu vini sem ég kynntist á leiðinni. Nýjum eigendum og stjórnendum á blaðinu óska ég alls hins besta. Þið eruð með geggjað stöff í höndunum.“

Sveinn Arnarsson, blaðamaður á Fréttablaðinu, tjáði sig einnig um starfslok sín í dag á Facebook. Þar segir hann breytingar vera í vændum á Fréttablaðnu þar sem nýtt fólk er að setjast í bílstjórasætin.

„Ég er stoltur af mínu litla framlagi til upplýstrar umræðu síðustu ár. Geng ég sáttur og þakklátur upp úr stólnum.“