Kona kom á lögreglustöðina í Keflavík í fyrradag og tilkynnti að hún hefði verið bitin af hundi. Í skeyti frá lögreglu kemur fram að konan hafi verið á gangi með hund sinn þegar laus hundur kom aðvífandi með þeim afleiðingum að hundarnir tveir ruku saman.

Að sögn lögreglu beit lausi hundurinn konuna og leitaði hún til læknis þar sem bitsárið var saumað og henni gefin stífkrampasprauta. Nánari upplýsingar um málið koma ekki fram hjá lögreglu.

Þá varð umferðaróhapp á Rósaselstorgi þegar ökumaður ók á aðra bifreið. Ekki urðu slys á fólki en ökumaðurinn umræddi er grunaður um akstur undir áhrifum fíkniefna.