Lögreglan á höfuðborgarsvæðinu brást við aðstoðarbeiðni rétt fyrir hádegi í dag en Lögreglan á Vesturlandi hafði veitt bifreið athygli sem var ekið á miklum hraða við Hvalfjarðargöng í átt að borginni.

Í tilkynningu sem lögreglan á höfuðborgarsvæðinu sendi frá sér kemur fram að ökumaður hafi ekki virt ítrekuð stöðvunarmerki lögreglu og var talinn valda mikilli hættu, enda var bifreiðin mæld á rúmlega 200 kílómetra hraða þegar mest var.

Að sögn lögreglu var lögð naglamotta í veg fyrir bifreiðina og var hún loks stöðvuð í Mosfellsbæ. Þar veittist ökumaðurinn að lögreglumönnum og var handtekinn. Málið er í rannsókn og er ekki hægt að veita frekari upplýsingar um það að svo stöddu.