Umferðin á höfuðborgarsvæðinu í ágúst jókst mjög lítið, eða um 0,4 prósent, samkvæmt tölum sem Vegagerðin birti í gær. Hefur umferðin frá áramótum einungis aukist um 1,2 prósent og er útlit nú fyrir að heildaraukningin í ár geti numið 2,4 prósentum, samkvæmt reiknilíkani Vegagerðarinnar. Það yrði þá minnsta aukning síðan árið 2012.
Að sögn Vegagerðarinnar jókst umferð samtals um 0,4 prósent yfir þrjú lykilmælisnið Vegagerðarinnar á höfuðborgarsvæðinu í nýliðnum mánuði miðað við sama mánuð á síðasta ári. „Þessi litla heildaraukning er borin uppi af 1,5% aukningu í mælisniði ofan Ártúnsbrekku því umferð í hinum tveimur sniðunum dróst saman um 0,4% og 0,2%. “
Í tölum Vegagerðarinnar kemur fram að umferð hafi aukist um 1,2 prósent frá áramótum, en leita þarf aftur til ársins 2012 til að finna minni aukningu miðað við árstíma. „Umferðin jókst í öllum vikudögum nema sunnudögum en þar mældist 1,5% samdráttur miðað við sömu vikudaga í ágústmánuði 2018. Mest var ekið á fimmtudögum en minnst á sunnudögum í nýliðnum mánuði. Nú er gert ráð fyrir að umferð geti aukist um 2,4% miðað við síðasta ár. Gangi það eftir verður þetta minnsta aukning frá árinu 2012,“ segir í frétt um málið á vef Vegagerðarinnar.
