Í daglegri samantekt bandaríska blaðsins New York Times er gefið í skyn að helsta ástæðan fyrir því að Íslendingum sé mörgum illa við hernaðaruppbyggingu á Keflavíkurflugvelli megi finna í „álfatrú“ Íslendinga. Þetta nefnir blaðið í samhengi við komu Mike Pence til Íslands.

„Áætlun Bandaríkjanna um frekari uppbyggingu herstöðvarinnar hefur mætt nokkurri andstöðu meðal þessarar samheldnu þjóð. Það er ekkert nýtt. Árið 1982 greindi New York Times frá því að mótmæli gegn herstöðinni væru byggð á sérkennilegum íslenskum rökum. Almenningur hefði áhyggjur af því að álfar yrðu fyrir ónæði,“ segir meðal annars í samantekt blaðsins.

Forseti Bandaríkjanna kallar New York Times iðulega falsfréttamiðil á Twitter. Ljóst er að þessi fréttaskýring blaðsins afsanni það ekki, enda vita flestir Íslendingar að álfatrú var ekki helsta einkenni Samtaka hernaðarandstæðinga.

Íslendingur nokkur bendir á þetta á Twitter og skrifar: „Enn er verið að draga úr trúverðugleika Íslands á alþjóðavettvangi með því að benda á að andstaða við uppbyggingu Bandaríkjahers hér á landi byggist fyrst og fremst á „álfatrú“ landsmanna. Þið verðið að gera betur.“

Enn er verið að draga úr trúverðugleika Íslands á alþjóðavettvangi með því að benda á að andstaða við uppbyggingu Bandaríkjahers hér á landi byggist fyrst og fremst á „álfatrú“ landsmanna. Þið verðið að gera betur @nytimes. https://t.co/3l3xOcjwIP

— Matthías Aron (@maolafsson) September 4, 2019