Lögreglan á höfuðborgarsvæðinu verður með töluvert eftirlit um verslunarmannahelgina, líkt og undanfarin ár. Áhersla verður lögð á eftirlit með að ökumenn aki ekki of hratt, séu ekki í símanum við akstur, en einnig verður haft eftirlit með eftirvögnum og hættulegum framúrakstri. Þetta kemur fram í færslu á Facebook.

Þar greinir lögregla jafnframt frá því að oftast sé reglum fylgt hvað við kemur eftirvögnum, þó hafi í sumum tilvikum lögregla bent ökumönnum á atriði sem betur megi fara, svo sem framlenging á hliðarspeglum

„Því miður eru líka alltaf einhverjir sem leyfa sér að virða ekki reglur um hámarkshraða, auk þess að nota farsíma án handfrjáls búnaðar við akstur en ekki þarf að fjölyrða um þá hættu sem það skapar í umferðinni.“

Lögreglan verður einnig á vakt í borginni og bendir fólki á að vera vakandi fyrir grunsamlegum mannaferðum. „Vill lögreglan ítreka að fólk láti vita um grunsamlegar mannaferðir (taki ljósmyndir ef slíkt er mögulegt) og að það skrifi líka hjá sér, t.d. bílnúmer eða jafnvel lýsingar á fólki, ef eitthvað óvenjulegt á sér stað í nánasta umhverfi þess. Innbrotsþjófar fylgjast gjarnan með húsum áður en þeir láta til skarar skríða, hringja jafnvel dyrabjöllunni og þykjast vera að spyrja eftir einhverjum, og því er mikilvægt að hafa þessi atriði í huga. Munið að það er betra að hringja einu sinni of oft í lögregluna með upplýsingar af þessu tagi en einu sinni of sjaldan.“

Þeim sem verða að heiman um helgina bendir lögregla á að ganga vel frá heimilum sínum. Til dæmis með að loka öllum gluggum og jafnvel með því að biðja nágranna að vera á varðbergi.

„Nágrannavarsla getur skipt sköpum þegar kemur að því að upplýsa innbrot eða koma í veg fyrir þau. Sérstaklega er minnt á að útiljós séu kveikt þar sem þau eru til staðar, hvort sem um ræðir baka til við hús eða að framanverðu. Slíkt einfaldar nágrönnum að sjá umferð/mannaferðir við húsin.“

Jafnframt getur verið mikilvægt að básúna ekki á samfélagsmiðlum þegar farið er að heiman. Slíkt geti boðið hættunni heim.

„Sömuleiðis er mikilvægt að fólk upplýsi ekki um fjarveru sína fyrir allra augum þegar farið er í frí, t.d. með tilkynningu á samfélagsmiðlum. Lögreglan verður með hefðbundið eftirlit um verslunarmannahelgina, en áhersla verður lögð á að fylgjast með íbúðarhúsnæði eins og kostur er.

Upplýsingum má koma á framfæri í síma 444 1000, með einkaskilaboðum á fésbókarsíðu Lögreglunnar á höfuðborgarsvæðinu eða í tölvupósti á netfangið abending@lrh.is Ef óskað er eftir skjótri aðstoð lögreglu vegna yfirstandandi innbrots skal undantekningarlaust hringja í 112.“