Formaður Afstöðu, Guðmundur Ingi Þóroddsson, gagnrýnir farbann yfir konu, meintum fíkniefnasmyglara. Í áhugaverðum pistli um málið dregur hann fram upplýsingar sem varpa ljósi á hvað farbönn geta verið íþyngjandi fyrir sakborninga.

Málið er reifað í frétt Morgunblaðsins. Þar kemur fram að Lögreglustjórinn á Suðurnesjum hefur óskað eftir áframhaldandi farbanni yfir konu sem var með 7000 Oxycontin töflur í fóðri ferðatösku sinnar þegar hún kom til Íslands frá Alicante á Spáni í apríl. Konan er búsett erlendis en með lögheimili á Íslandi. Konan segir töskuna vera í eigu annars og hún hafi ekki vitað um innihald hennar. Konan var upphaflega úrskurðuð í farbann til 22. maí. Farbannið var síðan framlengt og rann það út á föstudaginn síðasta. Gert er ráð fyrir því að farbannið verði framlengt enn frekar.

Guðmundur bendir á að miðað við þær reglur sem gilda um farbann þá virki það sem viðbótarrefsing sem ekki komi með nokkrum hætti til frádráttar endanlegri refsingu eftir að dómur hefur verið kveðinn upp:

„Það að úrskurða útlendinga í farbann og dæma þá síðan í fangelsi er ígildi þess að þeir þurfi að afplána sama dóm í tvígang. Þeir geta verið húsnæðislausir, auralausir, símalausir og hreinlega allslausir þannig þeir vita ekkert hvað þeir eiga að gera eða hvert þeir geta leitað.