Bílstjóri olíubíls sem valt á Öxnadalsheiði í morgun var fluttur með sjúkrabíl til Akureyrar. Meiðsli hans liggja ekki ljós fyrir. DV náði sambandi við móður bílstjórans og segir hún fjölskylduna vera í óvissu með ástand sonarins, en fjölskyldan býr á Austfjörðum: „Við erum að bíða eftir fréttum, það er verið að flytja hann í sjúkrahúsið á Akureyri og við erum að fara norður. Vonum það besta,“ segir móðirin.
Olíubíllinn valt á Öxnadalsheiði, skammt vestan Grjótár, og var þjóðveginum lokað á því svæði. Eftir að öryggi bílstjórans hafði verið tryggt var farið í það verkefni að takmarka sem frekast má olíumengun af völdum slyssins en olía hefur lekið úr bílnum.
Lögreglan á Norðurlandi vestra fer með rannsókn málsins og nýtur aðstoðar lögreglunnar á Norðausturlandi og slökkviliðs á Sauðárkróki og Akureyri.
UPPFÆRT
Móðir bílstjórans segir að för fjölskyldunnar til Akureyrar hafi verið frestað um sinn þar sem verið er að athuga hvort maðurinn verði fluttur með þyrlu landhelgisgæslunnar til Reykjavíkur.
Bílstjórinn er á gjörgæslu á sjúkrahúsi á Akureyri. Hann er með innvortismeiðsli og töluvert marinn á höfði og líkama. Hann er þó ekki talinn í lífshættu. – Þetta eru upplýsingar frá móður bílstjórans. Fjölskyldan býr á Austjörðum en er núna á leiðinni til Akureyrar í bíl. – Möguleiki var á því að sjúklingurinn yrði fluttur til Reykjavíkur með þyrlu en af því varð ekki og hefur tekist að sinna honum vel á Akureyri.
Búið er að opna veginn aftur.
