Listahátíðin LungA sem haldin er á Seyðisfirði náði hámarki um helgina með mörgum stórum tónlistaratriðum. Samtökin Snarrótin sem mjög beita sér gegn fíkniefnaleit á tónlistarhátíðum og gerðu það með áberandi hætti á Secret Solstice, segja að ólögleg fíkniefnaleit sé í gangi á hátíðinni á Seyðisfirði. Um þetta segja samtökin í tilkynningu:
„Snarrótinni hefur borist til eyrna að lögreglan sé að labba um tjaldsvæðið á LungA á Seyðisfirði með hunda og senda þá inn í tjöld til fólks. Snarrótin minnir á að það þarf dómsúrskurð til að leita á manneskju gegn vilja hennar. Þeir aðilar sem neita leit en lenda engu að síður í henni eiga rétt á bótum sé mál þeirra fellt niður/ekkert finnst á þeim.“
Samtökin segja að lögmenn þeirra bjóði öllum þeim sem í þessu lenda upp á fría lögfræðiaðstoð. Jafnframt hvetja samtökin fólk til að deila reynslu sinni af slíku á Facebook.
