Snemma í gærkvöld var tilkynnt til lögreglu um konu í annarlegu ástandi sem var að saga niður tré við Norðurbrún í Reykjavík. Konan er ekki eigandi trésins og hafði lögreglan afskipti af henni.

Þetta kemur fram í dagbók lögreglunnar. Þar segir einnig frá því að á fjórða tímanum í nótt var drukkin kona handtekin við veitingahús í miðbænun. Óskað hafði verið eftir lögreglu þar sem konan var grunuð um þjófnað.  Konan neitaði að gefa lögreglu upp nafn eða kennitölu og var hún því handtekin og færð á lögreglustöð.  Þá fór konan ekki að fyrirmælum lögreglu.  Upplýsingar fengust um konuna og var hún þá laus en hún var treg til að yfirgefa lögreglustöðina og var því færð með valdi frá lögreglustöðinni.

Á fimmta tímanum var tilkynnt um líkamsárás við veitingahús í miðbænum og hafði maður verið kýldur í andlitið. Ekki er greint frekar frá málinu í dagbókinni.

Alls voru 86 mál skráð hjá lögreglu frá kl. 17 í gær til 5 í nótt. Margar tilkynningar voru um partýhávaða í heimahúsum. Fjórir voru vistaðir í fangageymslum.