Boðað hefur verið til samstöðuaðgerðar með flóttabörnum á brúnni yfir Hringbraut í Reykjavík á sunnudag kl. 14. Er fólk hvatt til að mæta með létt barnaföt, blöðrur, tuskudýr og önnur létt leikföng sem fest verða á snúru sem strengd verður yfir handrið göngubrúarinnar.
Í tilkynningu frá hópnum sem stendur að aðgerðinni segir:
Síðustu daga hafa mörg þúsund manns lýst andstöðu við ákvörðun um að reka fjögur börn úr landi. Þar sem þessi tilteknu börn hafa eignast vini á Íslandi, sem eru tilbúnir til að tala máli þeirra, hafa viðbrögð almennings og umfjöllun fjölmiðla orðið nógu áberandi til að dómsmálaráðherra ákvað að opna á möguleika á endurskoðun. En sú ákvörðun merkir ekki að börn hælisleitenda séu örugg á Íslandi. Þau börn sem ekki eiga vini á Íslandi verða áfram rekin úr landi, rétt eins og þau hundruð barna sem á síðusu árum hafa verið rifin upp úr rúmi og send nauðug úr landi í lögreglufylgd í skjóli nætur. Áfangastaður margra þeirra er Grikkland en þar bíður þeirra heimilisleysi og sárafátækt. Mörg þeirra barna sem yfirvöld hafa sett á guð og gaddinn hafa þegar þjáðst af meira öryggisleysi en meðalmaðurinn á Íslandi upplifir á heilli mannsævi.
Það er ekki boðlegt að senda flóttafólk til Grikklands og allra síst börn.
Samkvæmt barnasáttmála Sameinuðu þjóðanna skal „[þ]að sem barni er fyrir bestu […] ávallt hafa forgang þegar félagsmálastofnanir á vegum hins opinbera eða einkaaðila, dómstólar, stjórnvöld eða löggjafarstofnanir gera ráðstafanir sem varða börn.“ Þetta hafa ríkisstjórnir Íslands og stjórnsýslustofnanir haft að engu þegar börn flóttafólks eru annars vegar.
Í tilkynningunni er jafnframt bent á að krafan um vernd flóttabarna snúist ekki bara um þessi fjögur börn sem hafa verið í fréttum undanfarið:
Hún snýst um mannsæmandi uppeldisaðstæður fyrir öll börn. Hún snýst um ábyrgð ríkisins á mannúðlegri meðferð á öllum börnum sem stödd eru í íslenskri lögsögu, ekki bara þeim sem eiga íslenska vini. Við ætlum ekki að láta ráðamenn komast upp með að virða skyldu sína gagnvart fjórum börnum, í þeim eina tilgangi að þagga niður gagnrýnisraddir, og halda síðan uppteknum hætti. Við munum því ekki þagna út á heimild – en ekki skyldu – til þess að taka mál til meðferðar. Við tökum ekki mark á þeirri réttarbót sem á að felast í því að skipa eina nefndina enn. Blandaður aðgerðahópur samtaka og einstaklinga efnir því til samstöðuaðgerðar með flóttabörnum á göngubrúnni yfir Hringbraut, sunnudaginn 7. júlí kl 14. Við ætlum að gera flóttabörn sýnileg með því að þræða barnafatnað upp á snúru og strengja hana yfir handriðið á göngubrúnni.
Brýnt er fyrir væntanlegum þátttakendum í aðgerðinni að hengja ekki sjálfir föt og hluti á snúruna heldur láta skipuleggjendur aðgerðarinnar gera það.
