„Druslugangan sér sig knúna til að tjá sig vegna fregna af meiðyrðamáli Jóns Baldvins Hannibalssonar á hendur Aldísi Schram, RÚV og Sigmari Guðmundssyni. Fyrst viljum við ítreka að við trúum Aldísi og öllum konunum sjö sem hafa stigið fram og ásakað Jón Baldvin um kynferðisofbeldi. Við trúum alltaf þolendum kynferðisofbeldis, hver sem gerandinn kann að vera. Þið eruð engar undantekningar þar á,“ segir í tilkynningu frá Druslugöngunni.

Tilefnið er fréttir af því að Jón Baldvin Hannibalsson, fyrrverandi ráðherra og sendiherra, hafi stefnt dóttur sinni, Aldísi, fyrir meiðyrði vegna ummæla hennar í morgunútvarpi RÚV. Aldís sakar föður sinn um kynferðisofbeldi og að hafa með vélabrögðum og samböndum inn í kerfið látið svipta sig sjálfræði.

Í tilkynningu  Druslugöngunnar segir enn fremur:

„Með aukinni umræðu um kynferðisofbeldi síðustu ár, hafa ofbeldismenn gripið til sinna ráða. Meiðyrðakærur eru orðnar helsta vopn gerenda til að þagga niður í þolendum sínum. Við sjáum þetta m.a. í nýlegri sakfellingu Hildar Lillendahl Viggósdóttur og Oddnýjar Aradóttur í Héraðsdómi. Við sem samfélag verðum að sýna í verki að við stöndum með þolendum.