Slökkviliðsmenn brutu bílrúðu til að bjarga barni úr brennheitum bíl í gær. Barnið hafði verið skilið eftir í bílnum. 25 stiga lofthiti var en í sól getur slíkur hiti tvöfaldast inni í bíl. Barnið var hætt komið en atvikið átti sér stað á bílastæðablani í Essex á Englandi, nánar tiltekið í bænum Saffron Walden. Barnið er 18 mánaða gamall drengur. Móðir barnsins fór burtu frá bílnum með systkini drengsins og kom ekki aftur fyrr en löngu síðar. Þá var búið að bjarga barninu úr bílnum en lögregla ræddi lengi við móðurina á meðan hlúð var að drengnum á sjúkrahúsi, en talið er að hann hafi ekki sakað.

Talið er að drengurinn hafi verið meira en klukkustund í bílnum þegar honum var bjargað. Greint er frá málinu á vefnum Metro og haft eftir sjónarvotti, 42 ára gamalli konu:

„Þetta var ótrúlegt. Allir voru að njóta góða veðursins þegar okkur bárust þær fréttir að lítil drengur væri grátandi, yfirgefinn í heitum bíl. Allir fóru að svipast um eftir foreldrum hans. Við áttum bágt með að trúa því sem var að gerast, tíu mínútum síðar voru engin merki um foreldra barnsins. Ég tárast af tilhugsuninni um það sem drengurinn þurfti að þola.“

Slökkviliðið á svæðinu gaf út svohljóðandi tilkynningu vegna málsins:

„Það er afar hættulegt að skilja eftir nokkra manneskju, hvað þá barn eða dýr, læst inni í bíl í þessum hita.“