Viðskiptavinur Costco höfðaði mál gegn fyrirtækinu eftir að innkaupakerrur runnu á bifreið hans og ullu talsverðu tjóni. Viðskiptavinurinn taldi Costco bera skaðabótaábyrgð og krafðist bóta sem næmu viðgerðarkostnaði á bifreiðinni auk kostnaðar vegna bílaleigubíls.

Þegar viðskiptavinurinn ók fram hjá aðalinngangi Costco í maí 2018, runnu tvær innkaupakerrur á bifreiðina. Í kjölfarið fyllti viðskiptavinurinn út tilkynningu á eyðublað frá Costco þar sem gerð var grein fyrir atvikinu með eftirfarandi hætti:

„Costco kerrur runnu á bíllinn minn þegar ég keyrði fram hjá. Beygluðu bílinn minn. Sjá myndir sem ég sendi.“

Í kjölfarið fór viðskiptavinurinn þess á leit við verslunina að þeir greiddu viðgerðarkostnað, en fékk engin viðbrögð og stefndi Costco fyrir dóm.

Viðskiptavinurinn taldi Costco bera ábyrgð á tjóninu þar sem frágangur við aðalinngang hefði verið ófullnægjandi. Þar væri 2° halli sem stuðlaði að því að kerrur færu á flakk. Einnig hefði starfsmaður verslunarinnar farið ógætilega að þegar hann var að ganga frá kerrunum, en viðskiptavinurinn taldi sig hafa séð starfsmann reka sig í kerrurnar áður en þær höfnuðu á bifreiðinni.  Þar að auki bæri verslunin ábyrgð á því að tryggja að það væru fullnægjandi staðir fyrir viðskiptavini til að skila kerrum með öruggum hætti og hafa eftirlit með að svo væri gert.

Costco krafðist sýknu og vísaði til þess að halli á aðalinngangi væri til þess fallinn að vernda viðskiptavini. Vegna hallans safnist vatn síður fyrir í frostum og því minni líkur á að viðskiptavinir slasi sig sökum hálku. Það væri mikilvægt fyrir viðskiptavini Costco að komast með kerrur sínar að bílaplani þar sem vörur væru oft þungar. Auk þess væri vel merkt á bílaplani að Costco beri ekki ábyrgð á tjóni sökum innkaupakerra.

Dómari leit til þess að viðskiptavinurinn hafði ekki vísað til neinna lagaákvæða sem kvæðu á um að hallinn væri dæmi um ófullnægjandi frágang. Fullyrðingar um að starfsmaður hefði komið þarna við sögu væru ósannaðar og viðskiptavinurinn hefði ekki  náð að sanna að tjónið hefði orðið vegna vanbúnaðar eða vanrækslu.

Costco var því sýknað af kröfunni .