Sama hætta er á gróðureldi á höfuðborgarsvæðinu eins og í dreifbýli. Veðursæld, aukinn gróður á höfuðborgarsvæðinu og þurrkur eru ástæðurnar. Í þeirri þurrkatíð sem verið hefur undanfarið eykst mjög hættan á eldi. Þetta kom fram í fréttum Stöðvar 2.
Rætt var við aðstoðarslökkviliðsstjóra á höfuðborgarsvæðinu sem segir að huga þurfi að svokölluðum brunahólfum eða varnarlínum sem koma í veg fyrir að eldur breiðist út. Íslendingar þurfi að átta sig á því að svona getur gerst hér á landi rétt eins og í nágrannalöndunum en miklir gróðureldar geisuðu á Norðurlöndunum síðasta sumar.
Á gróðursvæðum í borginni, til dæmis í Elliðaárdalnum, er gróður víða orðinn skraufþurr. Sum útivistarsvæðin eru nálægt byggð og því getur mikil hætta skapast ef eldur kviknar í gróðrinum og fer að breiðast út.
