„Þetta er pínulítill bær og það er rosalega mikil ferðmannaumferð hér,“ segir Aðalheiður Borgþórsdóttir, bæjarstjóri á Seyðisfirði, í samtali við Morgunblaðið í dag.
Í frétt blaðsins kemur fram að Seyðisfjörður hafi nú sett leiðbeinandi reglur til þeirra erlendu ferðamanna skemmtiferðaskipa sem heimsækja bæinn. Er Seyðisfjörður fyrsta bæjarfélagið hér á landi til að setja slíkar reglur.
Hátt í 70 skemmtiferðaskip munu koma til Seyðisfjarðar í sumar – býsna mikið sé litið til þess að Seyðisfjörður er ekki ýkja stór. Aðalheiður segir að hópur fólks hafi byrjað að ræða þetta fyrir tveimur árum og það hafi ekki komið til af góðu.
„Það var orðinn nettur pirringur því fólk er að taka myndir inn um glugga hjá fólki,“ segir Aðalheiður og bætir við að fólk hafi jafnvel verið að fara inn í garða.
Í reglunum er meðal annars kveðið á um að börn séu ekki mynduð án leyfis frá foreldrum. Þá eru ferðamenn hvattir til að ganga vel um og skilja ekki eftir rusl á víðavangi. Í frétt Morgunblaðsins kemur fram að reglurnar séu unnar í samvinnu við AECO, samtök leiðsöguskipafyrirtækja á norðurslóðum. Verkefnið er nýfarið af stað en fyrsta skemmtiferðaskip ársins kom til Seyðisfjarðar á miðvikudag í síðustu viku.
