Skömmu fyrir klukkan 18 í gær var tilkynnt um mann með skotvopn við Landspítalann. Lögreglan greip strax til viðeigandi aðgerða og var maðurinn handtekinn. Skotvopnið reyndist vera leikfang. Maðurinn var því látinn laus að skýrslutöku lokinni.

Á áttunda tímanum í gærkvöldi var maður handtekinn eftir að hann fór inn í söluturn vopnaður exi. Lögreglumenn voru skammt frá söluturninum þegar tilkynningin barst og var maðurinn handtekinn innan við 4 mínútum eftir að tilkynning barst. Maðurinn var vistaður í fangageymslu en hann var í annarlegu ástandi og með meint fíkniefni í fórum sínum.

Á sjötta tímanum í gærkvöldi var tilkynnt um grunsamlegar mannaferðir á Seltjarnarnesi. Tveir menn voru þar að kíkja inn um glugga á húsum. Þeir fundust ekki en lögreglan hvetur fólk til að tilkynna um hvers lags grunsamlegt athæfi.