Síðdegis í gær var parið handtekið í Hlíðarhverfi í Reykjavík en það var á bifreið sem var með mismunandi skráningarmerki að framan og aftan. Parið er grunað um að hafa stolið bifreiðinni, að hafa ekið henni undir áhrifum fíkniefna, að hafa ekið án ökuréttinda, að hafa ekið svipt ökuréttindum og vörslu fíkniefna.  Það var vistað í fangageymslu vegna rannsóknar málsins.

Á sjötta tímanum í gær var maður í annarlegu ástandi handtekinn í stigagangi fjölbýlishúss í Breiðholti. Hann er grunaður um brot á nálgunarbanni og var vistaður í fangageymslu vegna rannsóknar málsins.

Á öðrum tímanum í gær var tilkynnt um innbrot í hús í Mosfellsbæ. Þar hafði mikið verið rótað og verðmætum stolið. Gluggi hafði verið brotinn upp til að komast inn í húsið.

Á áttunda tímanum í gærkvöldi var maður handtekinn í Mosfellsbæ grunaður um líkamsárás og eignaspjöll. Hann var vistaður í fangageymslu.

Fimm ökumenn voru handteknir í gærkvöldi og nótt grunaðir um að vera undir áhrifum fíkniefna. Tveir ökumenn voru handteknir grunaðir um ölvun við akstur.