Lögreglan á höfuðborgarsvæðinu hafði, venju samkvæmt, í mörg horn að líta í gærkvöldi og í nótt. Einn ökumaður var stöðvaður fyrir ofsaakstur en bifreið hans mældist á 175 kílómetra hraða þar sem hámarkshraði er 80. Samkvæmt sektarreikni á vef Umferðarstofu getur ökumaðurinn átt von á ákæru og dómi vegna brotsins.
Gangandi vegfarendur óskuðu svo eftir aðstoð lögreglu í nótt vegna manns sem lá sofandi í runna í miðborginni. „Maðurinn vakinn af lögreglu og hélt hann för sinni áfram hinn hressasti eftir létt spjall við lögreglu,“ segir lögreglan í skeyti sem hún sendi fjölmiðlum í morgun.
Þá var tveimur unglingsstúlkum í annarlegu ástandi komið til aðstoðar, önnur stúlknanna er 13 ára en hin er 16 ára. Sú yngri var inni á bensínstöð í Mosfellsbæ þegar óskað var eftir aðstoð lögreglu. Stúlkan var í mjög annarlegu ástandi og veik sökum þess. Lögregla flutti stúlkuna á slysadeild þar sem foreldrum og barnavernd var gert gert grein fyrir málinu. Sú eldri var í heimahúsi í Hlíðunum og var hún mjög ölvuð. Stúlkan var flutt á slysadeild með sjúkrabíl og var foreldrum og barnavernd gert viðvart.
Nokkuð var um stympingar og ölvun í borginni. Þannig var óskað eftir aðstoð lögreglu vegna manns sem var til ama fyrir aðra gesti á skemmtistað í Breiðholti. Maðurinn var mjög ölvaður og var hann aðstoðaður út af staðnum og í leigubíl. Þá óskuðu dyraverðir í miðbænum eftir aðstoð lögreglu vegna manns sem veittist að þeim. Hann var fjarlægður af vettvangi og sleppt að upplýsingatöku lokinni. Svo var óskað eftir aðstoð lögreglu við gistiskýlið vegna líkamsárásar og eignaspjalla. Maðurinn var fjarlægður af vettvangi. Óskað var eftir aðstoð lögreglu í verslun í Breiðholti vegna konu í annarlegu ástandi. Henni var vísað út og hélt hún sína leið.
Loks er þess getið í dagbók lögreglu að óskað hafi verið eftir aðstoð lögreglu í Árbæ vegna gluggagægis. Kona hafði samband við lögreglu og sagði að maður væri búinn að liggja á glugganum hjá sér í 10 mínútur. Hann var hins vegar á bak og burt þegar lögregla kom á vettvang.
Lögreglan stöðvaði 6 ökumenn fyrir ölvun og eða fíkniefnaakstur. Einnig reyndust tveir þeirra sviptir ökuréttindum og með fíkniefni í fórum sínum.
Loks sinnti lögregla útköllum vegna hávaða víðs vegar um borgina.
