Ragnar Guðmundsson, eigandi Hótel Adam, birti um helgina óþægileg skilaboð er varða Ölmu Mjöll Ólafsdóttur, blaðamann á Stundinni, en skilaboðin voru viðbrögð við frétt hennar frá föstudegi sem vakti mikla athygli og fjallaði um fyrirhugaða kynningu á námskeiðum samtakanna ESA í vopnaburði. Vefur Hringbrautar greinir frá málinu og framgöngu Ragnars á Adam í nýlegri frétt.

Skilaboðin voru sett inn við pistil Helga Helgasonar, varaformanns Þjóðfylkingarinnar, og virðast fela í sér hótun. Þess skal getið að Helgi sýndi enga slíka tilburði í þó umdeildum skrifum sínum og atyrti Ragnar fyrir athugasemd hans. Hringbraut greinir einnig frá því að Facebook-síðu Helga hafi verið lokað.

Forsaga málsins er eins og fyrr segir frétt Stundarinnar um kynningu á námskeiðum ESA í vopnaburði, en kynningin féll niður á síðustu stundu þar sem Grand Hótel hætti við að hýsa hana. ESA (Security Academy Iceland) hefur með réttu eða röngu verið tengd við hægri öfgaöfl og þjálfun öfgamanna sem vilja beita vopnum gegn innflytjendum.

Helga Helgasyni gramdist mjög að hann væri, að hann taldi, tengdur við samtökin en hann sagðist ekkert hafa með hina umræddu námskeiðakynningu að gera. Hellti hann sér yfir blaðamann Stundarinnar, miðilinn i heild og eigendur. Sakaði hann m.a. Reyni Traustason, einn stofnenda miðilsins, um fíkniefnasmygl og vísaði þar til frægs máls þar sem Reynir í hlutverki blaðamanns gerði tilraun sem sýndi fram á hvað auðvelt væri að smygla fíkniefnum til Íslands með farþegaferjum. Fíkniefnsmyglið var með öðrum orðum fyrir opnum tjöldum og var atriði í heimildarmynd sem Reynir var að vinna að.

Í umræðum undir reiðilestri Helga steig síðan áðurnefndur Ragnar á Hótel Adam fram og skrifaði: „Vantar heimilisfang blaðakjánans.“ Í því samhengi sem athugasemdin birtist er erfitt að skilja hana öðruvísi en sem hótun enda kom hún í kjölfar hins reiðilega pistils og fjölmargra reiðilegra athugasemda annarra um Ölmu Mjöll blaðamann Stundarinnar undir pistlinum. Brást Helgi enda hart við og álasaði Ragnari fyrir slíka framgöngu og lýsti sig andsnúinn öllu ofbeldi. Sem fyrr segir hefur Facebook-síðu hans nú verið lokað.