Á annan tug ökumanna gerðist brotlegur í umferðinni í umdæmi lögreglunnar á Suðurnesjum í vikunni. Einn þeirra sem staðinn var að hraðakstri var einnig undir áhrifum fíkniefna að því er sýnatökur á lögreglustöð sýndu.
Í skeyti frá lögreglunni á Suðurnesjum kemur fram að bifreið mannsins hafi mælst á 139 kílómetra hraða þar sem hámarkshraði er 90 kílómetrar á klukkustund. Allmargir til viðbótar voru kærðir fyrir hraðakstur. Þá voru nokkrir ökumenn teknir úr umferð vegna gruns um vímuefnaakstur og jafnframt bar nokkuð á að menn ækju án ökuréttinda.
